በድሬዳዋ "ፈናን ፔይ " ሻምፒዮን የታዳጊ ወጣቶች የብስክሌት ውድድር ተጀመረ።

Dire TOTO አስተያየት l ነሐሴ ፣ 6 ቀን 2017

ከነሐሴ 6 እስከ ነሐሴ 11 2017ዓም በሚቆየው የታዳጊ ወጣቶች የብስክሌት ሻምፒዮና  የመክፈቻ ውድድሩን ታዳጊ ብሩክ በጋሻው በአንደኝነት አጠናቋል።

አስተያየት l  ውድድሩን የተከታተሉ ተመልካቾች ምን አሉ ?

በድሬዳዋ ጠቅላይ ፖሊስ መምሪያ ፊት ለፊት በተደረገው የሰላሳ ዙር የዳገት ላይ የብስክሌት ውድድር የተጀመረው "ፈናን ፔይ  ሻምፒዮና " የታዳጊዎች የመክፈቻ ውድድር  ላይ የድሬዳዋ ብስክሌት ስፖርትን መሰረት በማስያዝ ተተኪ ስፖርተኞችን ለማፍራት አይነተኛ ሚና ያለው ነው ብለዋል  የድሬዳዋ አስተዳደር ስፖርት ምክር ቤት ስራ አስፈጻሚ አባል አቶ ዮናስ በትሩ ።

የብስክሌት ስፖርት የድሬዳዋ ባህላዊ ስፖርት ነው ለማለት የሚያስደፍር ታሪካዊ ዳራ ያለው ነው ያሉት አቶ ዮናስ በትሩ ፣በሚደረጉ ሀገር አቀፍ የብስክሌት ሻምፒዮና  እና በተለያዩ አለማቀፍ ውድድሮች በሜዳሊያ እና በቀደምት ተሳታፊነት ታሪክ ያስመዘገቡ ስመ ጥር ስፖርተኞች መፍሪያና መፍለቂያ ጭምር የሆነችው ድሬዳዋ ላለፉት ዓመታት ይህ የብስክሌት ስፖርት ተቀዛቅዞ ከነበረበት ዳግመኛ መሠረቱን ማነጽ በሚያስችል ሁኔታ ሰፊ ቅድመ ዝግጅት በማድረግ የታዳጊዎች ብስክሌት ሻምፒዮና ውድድር መጀመሩ ከድሬዳዋ አስተዳደር ባለፈ በሀገር አቀፍ ደረጃ ትልቅ ፋይዳ የሚያስገኝ ነው ብለዋል።

የብስክሌት ውድድሩ  ላይ የሚሳተፈውን ልጃቸውን  በስፍራው ላይ ተገኝተው ሲደግፉና ሲያበረታቱ ያገኘናቸው ወይዘሮ አፈወርቅ ደመላሽ ፣ ለብስክሌት ስፖርት ልጃቸው ያለውን ትልቅ ፍላጎትና ፍቅር ገልጸው፤ እንዲህ ያለው ውድድር መዘጋጀቱ ልጆች ወደ ወደፊት ህልማቸው የሚደርሱበትን ምቹ ሁኔታ የሚፈጥር እንደመሆኑ አዘጋጆቹን ላመሰግን እወዳለሁ ነው ያሉት።

አቶ ንጉሱ አዲሱ በሰጡት አስተያየት ፣ በድሬዳዋ ደማቅ የነበረው የብስክሌት ውድድር ከተቀዛቀዘበት ዳግመኛ ትንሳኤውን ለማየት የሚያስችል ተስፋ በስፖርት አፍቃሪያኑ ዘንድ የፈጠረ ነው ይህ የታዳጊዎች ብስክሌት ሻምፒዮና ፣ ምክንያቱም ተተኪ ስፖርተኞች የሚፈልቁበት እንደመሆኑ ስለዚህ አዘጋጆቹና ወጣቱ ባለሀብት አቶ ቢኒያም ነገሱን ማመስገን እፈልጋለሁ በማለት ያላቸውን አድናቆት ገልፀዋል ።

ልጆች አልባሌ ቦታዎች እንዳይውሉ፣ አካላዊና አእምሯዊ ጤናቸው ተጠብቆ የነገ ሀገር ተረካቢ ዜጎች እንዲሆኑ ስፖርት ያለውን ፋይዳ ከግምት በማስገባት እንዲህ ታዳጊዎችን የማከሉ ስፖርቶችን ሌሎች ተቋማትና ድርጅቶችም የራሳቸውን ድርሻ በመጣት አስተዋጾ ሊያደርጉ ይገባል ያሉት ደግሞ ውድድሩን ሲከታተሉ የነበሩት ወይዘሮ አፈወርቅ ደመላሽ  ለድሬዳዋ አስተዳደር መንግስት ኮሚኒኬሽን በሰጡት አስተያየት ።

የድሬ ቶቶ ስፖርት ክለብ ስራ አስፈጻሚ አባል እና የክለቡ ስራ አስኪያጅ   አቶ ዮናስ ተፈራ በበኩላቸው "የአሪፍ ስፖርት አገልግሎት እህት ድርጅት የሆነውን ፈናን ፔይ ከድሬዳዋ ብስክሌት ፌዴሬሽን እና ወጣቶችና ስፖርት ኮሚሽን ጋር በመተባበር ያዘጋጁት ይህ  "ፈናን ፔይ " ከተማ አቀፍ ሻምፒዮና የብስክሌት ውድድር የድሬዳዋን ብስክሌት ስፖርት ላይ ከመሠረቱ ጀምረን በመስራት ትርጉም ያለው ለውጥ ለማምጣት ግብ ጥለን እያከናወነው ያለው ተግባር አካል ነው ።

የእለቱን የመክፈቻ የሃያ አምስት ዙር የዳገት ግልቢያ የብስክሌት ውድድር በአንደኝነት ያጠናቀቀው ታዳጊ ብሩክ በጋሻው በበኩሉ ወደ ቀጣይ ምእራፍ ለማደግና ለመሸጋገር ትልቅ እድል የምናገኝበት ውድድር ነው ፣ ውድድሩ ፈታኝና ከባድ ቢሆንም በአንደኝነት በማጠናቀቄ ትልቅ ደስታ ተሰምቶኛል ብሏል።