በድሬዳዋ የብስክሌት ውድድር  በክለቦች መካከል  ጠንካራ ፉክክሮችን እያስተናገደ ቀጥሏል፡፡ በዚህ ጥንቅራችን  ያለፉትን ጨዋታዎች አስገራሚ ክስተቶች ጋር  መለስ ብለን ተመልክተናቸዋል፡፡ 

ከድሬዳዋ - ቀርሳ .. ከቀርሳ ላንጌ ከላንጌ -ቁሉቢ - ከቁሉቢ-ጨለንቆ ተመልሶ ከጨለንቆ -ቁሉቢ ከቁሉቢ - ላንጌ በመጨረሻም ከላንጌ ..ቀርሳ ..አበቃ ውድድሩ ተፈጸመ፡፡ 

"በፅናት ህመማቸውንና ድካማቸውን ተቋቁመው  የታገሉት ጉልበት ፣ ጥሩ የማሸነፍ ዕድል ላይ እያሉ  በመጥፎ አጋጣሚ  ከመንገዳቸው የተሰናከሉበት  እና በደስታና በፍቅር የተቀበለንን የምስራቅ ሐረርጌ ዞን ህዝብን ያገኘንበት የብስክልት ስፖርት ውድድር በመሆኑ መቼም ቢሆን አንተረሳውም ፡፡" የድሬ ቶቶ ስፖርት ክለብ ምክትል ፕሬዝዳንት አቶ ዳንኤል ምትኩ (መልኬ)  በነገራችን ላይ የቶቶ ብስክሌት ስፖርት ክለብ ፕሬዝዳንትን የአቶ ዳንኤል ምትኩ አስተያየት ብዙዎች እንደሚስማሙበት ግልፅ ነው፡፡ ለምን ቢባል የሀሙሱ ውድድር ከእርስ በእርስ ብስክሌተኞች ግጥሚያ ባሻገር የተለያዩ ታላቅ ጥቅምና  ትርጉም የሚሰጣቸው ሁነቶች የተስተናገደበት ውድድር  ነው፡፡ 

ይሄ ውድድር ከሚያዚያ 26 ቀን እስከ ግንቦት 10 ቀን 2017 ዓ.ም ድረስ ለሦስት ተከታታይ ሳምንታት የሚካሄድ ሲሆን 3ቱ የድሬዳዋ ክለቦች ድሬዳዋ ከተማ (ድሬ ከነማ) ፣ ድሬዳዋ ፖሊስ እና የድሬ-ቶቶ ብስክሌት ክለቦች የሚሳተፉበት ውድድር  ነበር፡፡  ውድድሩ በቅደም ተከተል ሲካሄድ ቀዳሚ የነበረው ሚያዚያ 26 ቀን 2017 ዓ.ም በድሬዳዋ ከተማ ልዩ ስሙ ፖሊስ መምሪያ እስከ ማሪያም ሠፈር  አካባቢ የተካሄደ የጎዳና ላይ የብስክሌት ውድድር  ሲሆን በርካታ ተመልካቾች የተከታተሉት መሆኑ እጅግ ደማቅ አድርጎታል፡፡ 

ታዲያ ይሄ ውድድር 35 ዙር አንዱ ዙር 2፡5 ኪ.ሜ የሆነና በድምሩ 87፡6 የሚሸፍን የጎዳና ላይ የዙር ውድድር  ነው፡፡ 6ኛው መላው የድሬዳዋ ጨዋታዎች የብስክሌት ውድድር የሁለተኛው ቀን መርሀግብር ባለፈው ሐሙስ ሚያዚያ 30 ቀን 2017ዓ.ም የተካሄደው የሀገር አቋራጭ የጎዳና ላይ የብስክልት ስፖርት ውድድር የድሬዳዋንና የኦሮምያ ክልል ምስራቅ ሐረርጌ ዞን ህዝቦችን ቅርርባቸውን ያጠናከረ  መሆኑን የሚናገሩት ብዙ ናቸው፡፡ 

ወደ እዚህ ድምዳሜ ላይ የተደረሰውም ውድድሩ መነሻውን ድሬደዋ ከተማ ልዩ ስሙ ሃይስኩል ከሚባለው አካባቢ ደንገጎ ፣ቀርሳ ፣ ላንጌ ፣ ቁሉቢ እና ጨለቆ የሚባሉትን ገጠር ቀመስ ከተሞችን አቆራርጦ ማሳረጊያውን በቀርሳ ከተማ ላይ ማድረጉ በትንሹም ቢሆን የህዝብ ለህዝብ ቅርርብና ትስስር መፍጠሩ አይቀሬ ነው፡፡ ይሄ ደግሞ በእለቱ በደንብ ታይቷል፡፡ የምስራቅ ሐረርጌ ዞን ህዝብ ለድሬዳዋ ያለውን ጥብቅና ጥልቅ ፍቅር ያሳየን አጋጣሚ የፈጠረም ነበር፡፡ ይሄኛውም በግልፅ በተግባር ታይቷል፡፡ 

ከዚህ በዋነኝነት ደግሞ ጠንካራ ፣ ብርቱ ፣ ተፎካካሪ ብስክሌተኞች ቀጥ ብለው የቆሙ ዳገቶችን ለመውጣት ብስክሌታቸውን  ቆመው በማራኪ የአነዳድ ጥበብ ተመልካችን ያሰደመሙበት እና እኛም የሚዲያ ቡድን አባላቱ በትኩስ ጣፋጭ ኬክ የመሰልነውን ምርጥ አየር  በአፍና ባፍንጫችን እየማግን ዙሪያ ገባውን ጋራ ሸንተረሩን እንዲሁም አረንጓዴ ልምላሜውን በትኩረት ተመልክተን በተፈጥሮ ተደንቀን አጀብ ጉድ የተባለለትን ጊዜ አሳልፈን ወደ ቤታችን ተመልሰናል፡፡ 

እንደ እውነቱ ከሆነ 6ኛው መላው ድሬዳዋ ጨዋታዎች የብስክሌት ስፖርት ክለቦች ውድድርም ከውድድርም ባለፈ ትልቅ ትርጎም ያለው የእርስ በእርስ መገናኛ ሰላማዊ መድረክ ነበር ለማለት ይቻላል፡፡  ለአብነትም ከተወዳዳደሪዎች መሀከል ከተለያዩ ክልሎች (ትግራይ ፣ አማራ ፣ ኦሮሚያና ሐረሪ ) የመጡ ብስክሌተኛች በሦስቱ የድሬዳዋ ክለቦች ስር ታቅፈው የእለቱን የውድድሩን መርሀግብር ያካሄዱበት ነበር፡፡  ይሄ እንግዲህ አንዱ የአብሮነት ማሳያ ነው፡፡ ሌላው ደግሞ የብስክልት ስፖርት ተመልካቹ እንደዛው ከተለያየ አቅጣጫና መንገድ በአንድ ላይ ብስክሌቱን ተመልክቶ ለመደሰት የተሳባሰበ ነው፡፡ 

ወድድሩ አጀማመሩ ሁሉም ተወዳዳሪዎቸ በእኩል ተለቀው ከሞላ ጎደል  እስከ  ቀርሳ ከተማ መግቢያ ድረስ  ሳይነጣጠሉ የተጓዙበት እና በኋላ ላይ ደግሞ የተለያዩበት ሂደት ነበር  ፤ በውድደሩ የሁለተኛው ምዕራፍ የተከናወነው፡፡የተጓዙበት ነው፡፡  በዚህም የፖሊሱ ናትናኤል ጥላሁን  ፣ የቶቶው ካሌብ በላይ እና የከነማው ተጫዋች ከሌሎቹ ተነጥለው ወደፊት የወጡበት አጋጣሚ ተፈጠረ፡፡ ይሄ ተጣማሪነታቸው ደግሞ እነ ላንጌ ፣ ቁሉቢን አልፎ ጨለንቆ ከተማ መግቢያ አቅራቢያ ድረስ የዘለቀ ነበር ፡፡ ጨለንቆ ከተማ መግቢያ አቅራቢያ  ሲደርሱ ግን ከኋላ በፈጣኑ ብስክሌት ጋላቢው በቶቶው አሚር ጃፈር የሚመራው ንዑስ አጀብ የፊተኞችን እግር በእግር ተከታትሎ እሱ ከሚጋልብብት አጀብ ጋር ቀላቀለው፡፡ 

ታዲያ በዚህ ጊዜ የሁለቱ መዋሀድ የአጀቡን  ግርማ ከቀድሞ በበለጠ ጨምሮታል፤ በተለይ አሚር ጃፈር ፣ ካሌብ በላይ እና ናቲ በጎሪጥ እየተያዩ አንዱ ቆርጦ ለመውጣት ሲያሳዩ የነበሩት እንቅስቃሴ አተኩሮ ለተመለከተው  ሲበዛ መሳጭ ነበር ማለት ይቻላል፡፡ " በወቅቱ በዚህ አጀብ ውስጥ ከሚገኙት መሀከል አሚር ጃፈር ጥሩ አቋም ላይ እንደሚገኝ በቀላሉ አይቶ መናገር ይቻላል ፡፡" የሚለው የድሬ-ቶቶ የብስክሌትስፖርት ክለብ ም/ፕሬዝዳንት አቶ ዳንኤል ምትኩ " አሚር ብስክሌቱ ባይበላሽበት ኖሮ 1ኛ ይወጣ ነበር… ይህ ሳይሆን ቀረና አሚር ባጋጠመው መጥፎ ዕድል ሳቢያ ለራሱም ለክለቡም ክብርን ሳያቀናጅ ቀርቷል " በማለት አስተያየቱን አክሏል፡፡ የአሚር በብስክልት ብልሽት ምክንያት ከመንገድ የቀረውን እግር ተክቶ ወደፊት ሽምጥ የጋለበው መንፈሰ ጠንካራው ካሌብ የቀደሙት  ሁለቱ የፖሊስ ተወዳደዳሪዎች ናትናኤል ጥላሁንና ብሩክ ፍርዳወቅ  ላይ ለመድረስ ካደረገው ትግል አንፃር  ሙሉ አቅሙ ተጠቅሟል ማለት ይቻላል፡፡ በወቅቱ ሰዓቱ ከቀኑ 6 ሰዓት ቢያልፍም የቀትሯ ፀሀይ ጨረሯን በየአቅጣጫው ምድሩ ላይ  እየረጨች በከባድ ሀሩርና ሙቀት እንዳትለበልብ የእለቱ የአየር ንብረት አግዷታል፡፡ ሰማዩ ከፊል ዳማናመ በመሆኑ፡፡  አሁን የውድድሩ ማብቂያ የመጨረሻው መስመር ላይ ለመድረስ 3ቱም የፊት መስመር ላይ የሚገኙት ተወዳዳሪዎች (ናትኤየል ፣ ብሩክና ካሌብ)  ወደጎን እኩል መስመር ይዘው የቀርሳውን ዳገት ለመውጣት ትግል ይዘዋል፡፡ በመጨረሻ ግን የፖሊሶቹ ናትናኤልና ብሩክ  ቀጥ ብሎ የቆመው  ዳገታማ የአስፓልት መንገድ  በብስክሌታቸው የጎማ ጥርስ እንደምንም እየቧጠጡ ወደ ላይ ለመውጣት ሲሞክሩ የቶቶው ካለቤ ግን አቅም አንሶት ወደ ኋላ ይቀራል፡፡ 

ስለዚህም በውድድሩ የድሬዳዋ ፖሊስ የብስክሌት ስፖርት ክለብ በግልም  ፤በቡድንም፤ አሸናፊ መሆን የቻለበት አጋጣሚ ተፈጠረ፡፡ ናትናዔል ና ብሩክ 1ኛና 2ኛ ሆነው በመግባት ክለባቸው ፖሊስን የእለቱን ውድደር በግልም በቡድንም አሸናፊ እንዲሆን አደረጉት፡፡
ባለፈው እሁድ ውድድር የቡድን አሸናፊ የነበረው ድሬ-ቶቶ ክለብ በቡድን የሁለተኛ ደረጃን እንዲሁም የድሬደዋ ከተማ ክለብ ደግሞ  በቡድንም በግልም  የመጨረሻውን( ሦስተኛውን )ደረጃ ይዞ ለማጠናቀቅ ተገዷል፡፡

አሚር ጃፈር በሳይክል ብልሽት ወደኋላ ከቀረበት ቦታ ተነስቶ  እነ ካሌብ የፊተኞቹ ላይ ለመድረስ ያደረገው ፈጣን እንቅስቃሴ ባይሳካም ያደረገው ጥረት ግን የሚደነቅ ነበር፡፡ ሌላው በዚህ ውድድር ላይ እንደ አነጋጋሪ ክስተት ከወሰድነው የድሬ ፖሊሱ ታዳጊው ብስክሌተኛ  ብሩክ ፍርድአወቅ አሁን የሚገኝብት የብቃት ደረጃ ነው፡፡ ብሩክ በባለፈው እሁድ ውድድር ከድሬ ከነማው ተከትሎ ሁለተኛ ነበር መውጣት የቻለው፡፡ 

ብሩክ በሐሙሱ የሀገር አቋራጭ ውድድርም የቡድን አጋሩን ናትናዔል ጥላሁንን በመከተል በተመሳሳይ ሁለተኛ በመውጣት ነው ውድድሩን መጠናቀቅ የቻለው፡፡ ይሄ ክስተት ደግሞ ይሄ ልጅ ነገ ትልቅ ተስፋ የሚጣልብት ብስክሌተኛ የመሆን ዕደሉ የሰፋ መሆኑን በቀጥታ የሚጠቁም ነው፡፡ ብሩክ ገና የጉርምስና ዕድሜውን እንኳን አጣጥሞ ያልጨረሰ ቢሆንም በተከታታይ እሁድና ሐሙስ ቀን በተካሄዱት ውድድሮች  ሁለተኛ  ደረጃን ዞ ማጠናቀቁ በየጊዜው በቀላሉ የማይናወጥ አቋም ያለው ብስክሌተኛ መሆኑን ያሳየበት አጋጣሚ ነበር የተፈጠረው፡፡ ብሩክ " ዛሬው ውድድር በጣም ከባድና ፈታኝ የነበረ ቢሆንም ሁለተኛ መውጣት በመቻሌ በጣም ደስተኛ ነኝ… ይሄን ውጤት እንዳገኝ የረዳኝን ፈጣሪንና አባቴን  ፍርድአወቅ ደገፋን ሁሌም ከጎኔ ሆኖ ስለሚያበረታታኝና ስለሚደግፈኝ እሱን በጣም አመሰግናለሁ.." በማለት ከቶቶ ሚዲያ ኔትወርክ ጋር በነበረው ቆይታ ተናግሯል፡፡ 

በነገራችን ላይ በዚህ ውድድር ላይ ብሩክ፣ ናትናዔል እና ካለቤ ከሌሎች ተወዳዳሪዎች በርቀት 1ኛ፣2ኛ እና 3ኛ ደረጃ በመውጣት በለድል መሆን የቻሉበት ሚስጠር የተለያዩ ጫናዎችን ተቋቁመው በፅናት ማለፍ በመቻላቸው መሆኑን የቀድሞ ብስክሌተኛ ጃፈር አሚን ይናገራል፡፡ " የሀገር አቋራጭ የጎዳና ላይ ብስክልት ስፖርት ውድድር ከሌሎቹ የብስክልት ስፖርት ውድድር አይነቶች ከሚለይብት ምክንያቶች መካከል ብልሀት ፣ ጥንቃቄ እና ፅናት ተጠቃሽ ናቸው፡፡"የሚለው  የቀድሞ ብስክሌተኛው ጃፈር በውድድሬ ከፍ ያለ መስዋትነት የከፈሉ አሸናፊ መሆን መቻላቸውን ለቶቶ ሚዲያ ኔትወርክ ተናግሯል፡፡ 

በእለቱ የውድድሩን ማብቃት ተከትሎ ከራሳቸው ከቀድሞና ከአዲሶቹ ብስክሌተኞች  በተጨማሪ  ፣ አሰልጣኞችም ውድድሩን አስመልክቶ የራሳቸውን አስተያየት የሰጡ ሲሆን የፖሊስ የብስክልት ስፖርት ክልብ አሰልጣኙ ዋና ሳጅን መሳይ … " ከዝግጅታችን አንፃር ያገኘነው ውጠየት ይገባናል " በማለት  አስተያየቱን ለቶቶ ሚዲያ ኔትወርክ ሰጥቷል፡፡ 

የቶቶ ክለብ ቡድን መሪ አቶ ዮናስ ተፈራ  (አቡሌ)  በበኩሉ " በክለባችን ላይ ከባለፈው ውድድር አንፃር ሲታይ በግሌ ከቡድን ሥራ ጋር ተያይዞ የተወሰኑ ለውጦችን መሻሻሎች አስተውያለሁ … ስለዚህም ጠንካራ ጎናችንን በማጎልብት ደካማ ጎናችን በመቅረፍ በቀጣይ ውድድሮ ጥሩ ውጤት በማምታት በቡድንም በግልም አሸናፊ ለመሆን የአቅማችን ጥራት እናደርጋለን"  ያሉት አቶ ዮናስ በብልጠት ማነስ ተጫዎቻችን ውጤት ያጡበት ሂደት በጣም የሚቆጭ ነው ብሏል፡፡ 

"ከሁሉም በፊት ለዚህ ውድድር መሳካት የአንበሳውን ድርሻ የሚወስዱት የምስራቅ ሀረርጌ ዞን ከተማ ነዋሪዎች ሲሆኑ ፍፁም  በሰላምና በፍቅር  በደመቀ ሁኔታ ስለተቀበለንና ለውድድሩ ስኬት ከጎናችን ስላልተለዩን ፣ እንዲሁም የድሬደዋና የምስራቅ ሐረርጌ ዞን የፖሊስና የትራፊክ አባላት ሚናቸው ከፍ ያለ በመሆኑ ምስጋና ተችሯቸዋል፡፡ 

በተመሳሳይ አንዳንድ የምስራቅ ሐረርጌ ዞን ነዋሪዎች ለቶቶ  ሚዲያ ኔትወርክ በሰጡት አስተያየት " ውድድሩ እኛን ከማዝናናቱ ጎን ለጎን ልጆቻችን በብስክሌት ስፖርቱ እንዲሳቡ በማድረግ በኩል መልካም አጋጣሚ የፈጠረ ይመስለናል ብለዋል"፡፡  በጥቅሉ ባለፈው ሚያዚያ 26 ቀም 2017 ዓ.ም በይፋ ተከፍቶ የተጀመረው 6ኛው መላው የድሬዳዋ ጨዋታዎች የብስክሌት ስፖርት ውድድር በመጪው ግንቦት 10 ቀን 2017 ዓ.ም ከ15 ቀን ቆይታ በኋላ ይጠናቀቃል፡፡ ምንም እንኳን ውድድሩ እስካሁን  በተያዘለት መርሀግብር መሠረት ያለምንም መዛነፍ በተሳካ መልኩ  እየተካሄደ መሆኑ ባይካድም በተወሰነ ደረጃ አንዳን  ብስክሌተኛውን በተሸከርካሪ ለማጀብ ሲንቀሳቀሱ ያልተገባ ተግባር ፈፅመዋል በሚል የተወሰኑ የስፖርት ክለብ አመራሮች ቅሬታቸውን ደጋግመው ሲያቀርቡ ከውድድሩ መጠናቀቅ በኋላ ተሰምቷል፡፡
ስለዚህ የሚያዚያ 30 ቀን 2017 ዓ.ም የተካሄደው የሁለተኛው ቀን የውድድር መርሀግብር በተወሰነ መልኩ ገላጭ በሆነ መንገድ ለመግለፅ የተሞከረውን ትንተና ስንቋጭ የብስክልት ህዳሴያችን እጅግ ባጠረ ጊዜ  እውን ለማድረግ ሁላችንም በጋራ በመሆን ለአንድ ዓላማ ተሰልፈን መረባረብ ይጠበቅብናል በማለት መልዕክታችን እናስተላልፋለን፡፡ 

ግንቦት 1/2017 

በኤፍሬም አክሊሉ