"የብስክሌት ስፖርት ውድድር ከመሸናነፍ ባለፈ የተመልካችን ቀልብ መሳብ ግድ ይለዋል"

ባለፈው እሁድ ሚያዚያ 26 ቀን 2017 ዓ.ም 6ኛው መላው የድሬደዋ ጨዋታዎች የብስክሌት ውድድር ተካሂዷል፡፡ በውድድሩም 3ቱ የድሬደዋ ክለቦች ( ድሬ ከነማ ፣ ድሬ ፖሊስ እና ድሬ ቶቶ ) ተካፋይ ሲሆኑ ውድድሩን አስመልክተን ከአዲሱ የድሬ-ቶቶ ክለብ ዋና አሰልጣኝ ከሆኑት ምስግና ገብርዬ ጋር አጭር ቆይታ አድርገናል፡፡...እነሆ፦ 

* አሰልጣኝ ምስግና እንዴት ሰንብተካል?

*  "እግዚአብሔር ይመስገን ደህና ነኝ "

* ቶቶ ፡- ምስግና ገብርዬ ማነው ?

ምስግና ፡- የተወለድኩት በትግራይ ክልል አዲግራት ከተማ

አቅራቢያ ብዘት በምትባል አነስተኛ የገጠር መንድር ውስጥ ሲሆን  በ12 ዓመቴ ወደ ኤርትራ አስመራ ከተማ ያደገ በማቅና ለ10 ዓመት ያህል ቆይቼ ወደ መቀሌ ተመልሻለሁ ፣ የብስክሌት ስፖርትን በዛው በአስመራ በአማተር ደረጃ ጀምሬ የነበረ ቢሆንም ብዙም ሳልገፋበት ወዲያውኑ ወደ አሰልጣኝነቱ ጎራ ተቀላቅዬ ጣለሁ፤ የብስክሌት የትግራይ ልማት ፣ የትግራይ ክልል እና የሞሶቦ ሲሚንቶ የብስክሌት ስፖርት ክለቦችን በማሰልጠን ውጤታማ ማድረግ ችያለሁ፡፡ በአሁኑ ሰዓት ደግሞ ከሰሜን ወደ ምስራቁ በማቅናት  የድሬ-ቶቶ ብስክሌት ስፖርት ክለብን በማሰልጠን ላይ እገኛለሁ፡፡

ቶቶ ፡- ድሬዳዋን እንዴት አገኘሃት ?

ምስግና ፡- ድሬ እንደ አየር ጸባያ ሞቅ ያለች ቆንጆ ከተማ ናት፡፡ ድሬ ህዝቧም ቢሆን ፍቅር ነው ፡፡ ከሁሉም በላይ ደግሞ ብዙ ከተሞችን አይቻለሁ፡፡ የድሬ ህዝብ ለብስክሌት ስፖርት ያለው ፍቅር ልዩ ሆኖ ነው ያገኘሁት ፡፡ 

ቶቶ ፡- ለእሁዱ ጨዋታ ዝግጅታችሁ ምን ይመስል ነበር ?

ምስግና ፡- እኔ ወደ ክለቡ ከመጣሁ አጭር ጊዜ እንደሆነኝ ይታወቃል፤ ይሄም ቢሆን በመጣሁባቸው ጥቂት ቀናት ውስጥ ለውጤት ሊያበቁን የሚችሉ ስልጠናዎችን ልጆቼን እንዲወስዱ እያደረኩኝ ነው፡፡

በእነዚህ ቀናት ለእኛ ልጆች በብስክሌት ስፖርት ውድድር ላይ ውጤታማ ከሚያደርገው ቀዳሚው ምክንያት የቡድን ሥራ መሆንን በማስገንዘብ በዚሁ ላይ ትኩረት አድርገን ስንሠራ ነበር፡፡

ቶቶ ፡- ከእቅዳችሁ አንፃር የተገኘው ውጤትን እንዴት ትገልፀዋለህ ?

ምስግና ፡- በአጠቃላይ ከዕቅዳችን አንፃር ያሰብነውን አሰክተናል ነው የምለው፡፡ በተለይ ለእኔ እንደመጀመሪያዬ ገና ልንፈፅማቸው የሚገቡ የቤት ሥራዎች እንዳሉ ሆኖ  ያገኘነው ውጤት ግን  ጥሩ የሚባል ነው፡፡ በተለይ ቅድም እንደገለፅኩት የቡድን ሥራ ላይ ትኩረት አድርገን በመሥራታችን ከሁሉም በላይ ደግሞ ልጆቼ ከውድድር በፊት  ስነግራቸው የነበረውን በውድድሩ ወቅት ተግባራዊ በማድረጋቸው  በጣም ነው የተደሰትኩት፡፡ቶቶ ፡- በአጠቃላይ ውድድሩን እንዴት ገመገምከው ?

ምስግና ፡- በአጠቃላይ ሲታይ ውድድሩ ጥሩ ነበር ፡፡ እንደሚታወቀው በዚህ ውድድር ላይ ተሳታፊ የነበሩት የእኛ ክለብ ድሬ-ቶቶ ፣ ድሬዳዋ ከነማ እና ድሬ ፖሊስ ናቸው፡፡

እዚህ ጋር አንድ ማንሳት የምፈልገው ነጥብ ቢኖር ከእኛ በተቃራኒው የተሰለፉት ክለቦች  የሚጠበቀውን ፉክክር አለማድረግና ተመልካችን ያገናዘበ እንቅስቃሴ አለማድረጋቸው በእኔ በኩል እንደ አንድ ክፍተት ወስጄዋለሁ፡፡ ይሄን ስል ደግሞ እንደው ዝም ብዬ ያለምክንት አይደለም ፤ ዋናው ምክንያቴ ደግሞ የብስክልት ስፖርት ሳቢ ሆኖ ተመልካች እንዲኖረው ካስፈለገ ያልተቋረጠ እንቅስቃሴ የግድ በመሆኑ ነው፡፡

በዚህ ረገድ ሲመዘን የእሁዱ ውድድር ሰፊ ክፍተት የተመለከትኩበት እና ሁለቱ ክለቦች (ከነማና ፖሊስ) ለክፍተቱ መፈጠር ኃላፊነቱን መውሰድ ይኖርባቸዋል እላለሁ፡፡

ታዲያ ሁላችንም የብስክሌት ስፖርቱን እድገት የምንፈልግ ከሆነ የእዚህ አይነት ክፍተቶች ሲፈጠሩ ፈጥነው እንዲስተካከሉ የበኩላችን ርብርብ መወጣት እንደሚኖርብን እሙን ነው፡፡ ስለዚህ የእዚህ አይነቱ አካሄድ የብስክሌት ስፖርቱን እንዲያብ ከማድረግ ይልቅ በግልፅ ሊተች ይገባል ባይ ነኝ፡፡

ለአብነት ያህል በውድድሩ ወቅት  አብዛኛውን ዙር የእኛ ብስክሌተኞች በሙሉ አቅማቸው በመጋለብ ሲቆጣጠሩት በተቃራኒው የተጋጣሚዎቻችን ብስክሌተኞች ግን  የእኛን ሽምጥ ጋላቢዎች  እግር በእግር (አሮታ ) በመከታተል በብልጠት ጉልበት የመቆጠብና ትንፋሽ የመሰብስብ ተግባርን ሲፈፅሙ ነበር፡፡

ይሄ ደግሞ በቡድን ያገኘነውን ባለድልነት በግል አሸናፊነት መድገም እንዳንችል አድርጎናል፡፡ በሌላ አገላለፅ  እኛ ለተመልካቹ ጭምር እየተጨነቅን ውድድሩን ስናካሂድ ተጋጣሚዎቻችን ግን ባንፃሩ ይሄንን እንደ መልካም አጋጣሚ በመጠቀም 1ኛና 2ኛ በመውጣት በቀላሉ ልናሳካው እንችል የነበረውን የግል አሸናፊነት ከእጃንችን ላይ ቀምተውናል፡፡

ይሄ ደግሞ በቀጣይ ሊስተካከል የሚገባው ክፍተት እንደሆነ ነው የሚሰማኝ ፡፡ ለዚህ ደግሞ ሁሉም የስፖርቱ ቤተሰብና የሚመለከታቸው አካልት በጋራ ሊረባረቡበት የሚገባ ጉዳይ ሲሆን በተለይም ክለቦች ፣ ፌዴሬሽኑ ትኩራት ሰጥተው ሊሰሩበት ይገባል ነው የምለው፡፡ በአጠቃላ እዚህ ጋር አንድ መታሰብ አለበት የምለው ጉዳይ ቢኖር የብስክሌት ስፖርት ውድድር ከመሸናነፍ ባለፈ የተመልካችን ቀልብ መሳቡን ማረጋገጥ የግድ እንደሚለው ሁሌም ግንዛቤ ሊወሰድበት ይገባል ባይ ነኝ፡፡

ቶቶ ፡- በሐሙሱ ውድድር ምን እንጠብቅ ?

ምስግና ፡- የሐሙሱ ሚያዚያ 30ቀን 2017ዓም የሁለተኛ ቀን የውድድር መርሀግብር ሀገር አቋራጭ በመሆኑ በቂ ዝግጅት መፈለጉ የግድ ነው፡፡ እንደሚታወቀው የሀገር አቋራጭ የብስክሌት ስፖርት ውድደር በከተማ ውስጥ ከሚደረግ የዙር ውድድር በብዙ መልኩ ልዩነት ያለው ሲሆን የሀገር አቋራጭ ውድድር ብዙ ዳገትና ቁልቁለት ፣ የተለያየ መልካምድር እና የተለያየ አይር ንብረት ያለው በመሆኑ አሸናፊ ሆኖ ለማጠናቀቅ በቡድንም ሆነ በግል የብስክሌተኞቹንና የብስክሌተኛውን ጥንካሬና ፅናት ይጠይቃል፡፡

እኛ እነዚህን ነባራዊ ሁኔታዎች ከግምት ውስጥ በማስገባት በተለይም (Basic Endurance) የተባለው የአሰለጣጠን ዘዴ ላይ  የዘወትር ልምምድ ትኩረት  በማድረግ ለውድድሩ እየተዘጋጀን ነው፡፡ አመሰግናለሁ"

ቶቶ ፡- ስለፍቃደኝነት እኔም አመሰግናለሁ!!

ከድሬዳዋ ቶቶ ክለብ ዋና አሰልጣኝ ምስግና ገብርዬ ጋር  ያደረግነው ቆይታ አበቃ!!.

ሚያዚያ 29 ፣ 2017ዓም